YAMANG DAGAT, NASABAT
by JOHN BELLO

Lucena City - Muling nakasabat ang grupo ng Task Force Matatag at ilang kawani ng Maritime Police sa nasabing Lungsod ng dalawang libong sakong White Coral Sand na pagmamay-ari ni Luz Alvarez taga Brgy. Cotta, Lucena City. Ang naturang White Coral Sand ay nagmula sa lungsod ng Masbate. Batay sa Shipment Clearance na iginawad ng Provincial Environment and Natural Resources Office ng San Rafael, Sanpascul Masbate City kay Vicente Batiancillo, ang mga ito ay isinakay sa M/B Cookie, Arayat noong July 29, 2004, taliwas sa petsa na nakalagay sa permit na dala-dala ng driver ng truck na sinakyan ng 2,000 sakong puting buhangin na may petsang May 7, 2004.

Ayon kay Glenn M. Forbes ng Tanggol Kalikasan, at miyembro ng Task Force Matatag nakarating sa kanyang kaalaman ang pagdidiskarga ng naturang White Coral Sand ganap na ika-siyam ng umaga, July 29, 2004, kung kaya't agad niyang tinawagan ang ilang miyembro ng Task Force Matatag upang magsagawa ng operation. Mabilis din ang pagresponde ng local at national media kasabay ang pagdating ng ilang kapulisan ng Lungsod ng Lucena. Ganap na ika-labing isa ng umaga tapos ang operasyon.

Dagdag pa niya, nakiisa naman sa nasabing operasyon ang kawani ng PNP Maritime sa pamamagitan ng pagpara sa truck na sinakyan ng dalawang libong sakong buhangin.

Samantala ayon naman kay Glenn M. Ladiana ng Beureau of Fisheries and Aquatic Resources- Region IV-A, matagal ng nagsasagawa ng pagbibiyahe ng ganitong klase ng buhangin, subali't kataka-takang hindi ito nahuhuli ng awtoridad na nakabase sa loob mismo ng Dalahican Fishing Port.

Ayon kay PCI Agustin Ringor ng PNP Maritime na nakabase sa loob ng Dalahican Pier, lingid diumano sa kanilang kaalaman na kasama sa ipinagbabawal kunin sa ilalin ng dagat ang ganitong klase ng buhangin. Kung kaya't hindi nila hinuhuli ang mga nagdidiskarga at maging may-ari nito.

Kinumpirma naman ng kawani ng DENR na si Dr. Jun Balagas na isa nga ito sa ipinagbabawal kunin sa ilalim ng dagat.

Malinaw na isinasaad ng Batas Pampangisdaan o RA 8550, Section 92 na ipinagbabawal ang iba pang pamamaraang nakakapinsala sa coral reefs at iba pang tirahan ng mga hayop sa dagat. Sinuman ang mahuhuling nagsasagawa ng ganitong gawain ay maaring mabilanggo mula dalawang (2) hanggang sampung taon. Maaari din magmulta mula
P/ 100,000 hanggang P/ 500,000, parehong pagkabilanggo at multa ayon sa kapasyahan ng hukuman at pagkumpiska sa huli at mga kagamitan.

Nakilala naman ang driver ng truck na si Wilfredo Ayapana Cabayro taga Lucena City. Aniya, sa Brgy. Talao-Talao umano nila dadalhin ang mga buhangin at wala pang siguradong pagdadalhan ang mga ito dahil per order daw ang pagbebenta ng naturang buhangin. Nakilala din ang may -ari ng truck na si Ermelinda Dala na may plate number XHY 430.

Sinikap naming kapanayamin ang may-ari ng naturang buhangin na si Luz Alvarez, subalit tumanggi siyang magbigay ng pahayag. Sa kasalukuyan nakasampa na ang kaso sa Municipal Trial Court ng Lungsod ng Lucena laban sa may-ari at shipper/consigner na si Vicente Batiancillo. Nagkakahalaga naman ng nasa P/ 100,000 ang market value ng naturang buhangin. Subalit 500 sako lamang ang idiniklara ng may-ari nito taliwas sa bilang na nakalagay sa Shipment Clearance na hawak nila, bagay na inakala ng may-ari nito na mapapababa ang kanyang parusa.

Sa kasalukuyan, nasa pamamahala ng PNP Maritime ang naturang dalawang sakong puting buhangin o isang ten wheeler truck.

[ BACK ]